შეთანხმებაში გამოყენებული ტერმინები:

1. Catdog ან სუბიექტი, ე.ი., ინდივიდუალური მეწარმე ანტონ ივკინი, საიდენტიფიკაციო ნომერი: 305601774, რეგისტრაციის თარიღი: 27/02/2023, რომელიც წარმოადგენს CatDog სუბიექტისა და https://catdogpetsitters.com, https://catdog.ge ვებსაიტების (შემდგომში — ვებსაიტი) მესაკუთრეს.

2. მომვლელები, ე.ი., პირები, რომლებიც საკომისიო თანხის გადახდის სანაცვლოდ სარგებლობენ სუბიექტის საორგანიზაციო მომსახურებებით. სუბიექტი უზრუნველყოფს შემდეგ შესაძლო მომსახურებებს: სუბიექტისგან ცხოველის დროებით შეფარებას და/ან გასეირნებას და/ან ზოოძიძის მომსახურებების გაწევას (შემდგომში — მომსახურებები) და საორგანიზაციო მომსახურების გაწევის სანაცვლოდ საკომისიოს გადახდას სუბიექტისთვის.

3. კლიენტები, ე.ი., პირები, რომლებიც დაინტერესებულნი არიან მომვლელების მომსახურების მიღებაში და სუბიექტს მიმართავენ ვებსაიტზე განთავსებული ნებისმიერი საკონტაქტო მონაცემის საშუალებით.

4. მომხმარებლები — მომვლელები და კლიენტები, რომლებიც სუბიექტის მომსახურებებით სარგებლობენ.

5. ცხოველები — შინაური ცხოველები, რომლებსაც ფლობს კლიენტი საკუთრების უფლებით.

6. დროებით შეფარება — მომსახურება, რომელსაც მომვლელი აწვდის კლიენტს და რომელიც მოიცავს ცხოველის ბინადრობას მომვლელის სახლში, გასეირნებას, ცხოველის კვებასა და სხვა პირობებს, მომვლელსა და კლიენტს შორის დადებული ხელშეკრულების შესაბამისად.

7. გასეირნება — მომსახურება, რომელსაც მომვლელი აწვდის კლიენტს და რომელიც მოიცავს მომვლელის მიერ კლიენტის ცხოველის გასეირნებას, მომვლელსა და კლიენტს შორის დადებული ხელშეკრულების შესაბამისად.

8. ზოოძიძა — მომსახურება, რომელსაც მომვლელი აწვდის კლიენტს და რომელიც მოიცავს მომვლელის კლიენტის სახლში ყოფნას ამ უკანასკნელის ცხოველთან, ცხოველის კვებასა და სხვა პირობებს, მომვლელსა და კლიენტს შორის დადებული ხელშეკრულების შესაბამისად.

1. ზოგადი დებულებები

1.1. წინამდებარე სამომხმარებლო შეთანხმება (შემდგომში — შეთანხმება) არეგულირებს მომხმარებელთა წვდომას სუბიექტსა და ვებსაიტზე, მის გვერდებსა და ქვედომენებზე, ასევე, სუბიექტს, მომვლელებსა და კლიენტებს შორის ურთიერთობის წესებს, თუ ასეთი ურთიერთობა წარმოიქმნება ვებსაიტსა და/ან იმ მომსახურებებზე წვდომასთან დაკავშირებით, რომლებიც შემოთავაზებულია ვებსაიტზე ან სუბიექტის მიერ.

1.2. სუბიექტი უზრუნველყოფს მომხმარებლებისთვის ღია წვდომას ვებსაიტზე.

1.3. შეთანხმება დადებულად ითვლება მომხმარებლის მიერ ვებსაიტსა და/ან სუბიექტზე წვდომის მიღებისთანავე. შეთანხმების დადებაზე თანხმობის არარსებობის შემთხვევაში, მომხმარებელი ვალდებულია, შეწყვიტოს ვებსაიტზე წვდომა და სუბიექტის მომსახურებით სარგებლობა.

1.4. შეთანხმება ვებსაიტზე განთავსებულია მისამართზე: https://catdogpetsitters.com/agreement და სუბიექტის მიერ ერთპიროვნულად შეიძლება შეიცვალოს, შეცვლილი ვერსიის ზემოთ მითითებულ მისამართზე გამოქვეყნების გზით. შეთანხმების ახალი რედაქცია ყველა მომხმარებლისთვის ძალაში შედის ვებსაიტზე მისი განთავსების მომენტიდან.

1.5. კლიენტსა და მომვლელს შორის ურთიერთობის წესები რეგულირდება წინამდებარე შეთანხმებითა და მათ შორის გაფორმებული ხელშეკრულებით, რომელიც იდება კონკლუდენტური მოქმედებების განხორციელების გზით (შემდგომში — ხელშეკრულება).

2. მომხმარებელთა მოვალეობები

2.1. მომხმარებელი იძლევა გარანტიას, რომ აღჭურვილია შეთანხმების დადებისა და შესრულებისთვის საჭირო ყველა უფლებითა და უფლებამოსილებით.

2.2. მომხმარებელი ადასტურებს, რომ ეთანხმება შეთანხმებას.

2.3. მომხმარებელი იღებს შემდეგ ვალდებულებებს:

2.3.1. არ განახორციელოს მოქმედებები, რომლებიც ეწინააღმდეგება ან აბრკოლებს ვებსაიტის ან სუბიექტის მუშაობას;

2.3.2. არ დაარღვიოს მესამე პირთა უფლებები;

2.3.3. არ გამოიყენოს ვებსაიტი და სუბიექტის მომსახურება კანონსაწინააღმდეგო მიზნებისათვის ან ისეთი მიზნებისთვის, რომლებიც არ არის გათვალისწინებული შეთანხმებაში;

2.3.4. არ მოახდინოს ვებსაიტის ან სუბიექტის მომსახურების აღწარმოება, დაკოპირება, გავრცელება ან მისგან კომერციული სარგებლის მიღება, მათ შორის, მასზე განთავსებულ ან მასში შემავალ ნებისმიერ მასალასთან მიმართებით.

3. წესები კლიენტებისთვის

3.1. მომსახურებათა დასაჯავშნად, კლიენტი აფორმებს განაცხადს ვებსაიტზე და/ან მიმართავს სუბიექტს, ვებსაიტზე მითითებული საკონტაქტო მონაცემების გამოყენებით.

3.2. სუბიექტისთვის მიმართვისას, კლიენტი იძლევა ცხოველებზე აუცილებელი უფლებების არსებობის გარანტიას.

3.3. დროებით შეფარების მიზნით ცხოველის გადაცემამდე, კლიენტმა მომვლელს უნდა მიაწოდოს სრული, დეტალური და უტყუარი ინფორმაცია ცხოველის შესახებ, ვებსაიტზე განთავსებული პუნქტების მიხედვით, რომლებიც მოცემულია მისამართზე: https://catdogpetsitters.com/preparation.

3.4. კლიენტისთვის რეკომენდებულია, დროებით შეფარებამდე მომვლელს პირადად შეხვდეს ცხოველთან ერთად და გაეცნოს მას.

3.5. კლიენტმა მომვლელს უნდა გადასცეს ყველა აუცილებელი ნივთი, რომელიც ცხოველს სჭირდება დროებით შეფარების განმავლობაში. ნივთების სია ვებსაიტზეა მოცემული, მისამართზე: https://catdogpetsitters.com/preparation.

3.6. კლიენტმა მომვლელს უნდა დაუდასტუროს ცხოველის სახეობასა და ასაკთან შესაბამისი სრული და დროული ვაქცინაცია, ასევე, მწერებსა და პარაზიტებზე დამუშავება, ცხოველის ვეტერინარულ პასპორტში შესაბამისი ჩანაწერებით;

3.7. კლიენტმა მომვლელს უნდა მიაწოდოს საკუთარი საკონტაქტო მონაცემები, ასევე, თავისი წარმომადგენლის საკონტაქტო ინფორმაცია, გადაუდებელ საკითხებთან დაკავშირებული შემთხვევისათვის.

3.8. კლიენტისთვის რეკომენდებულია, წარადგინოს იმ ვეტერინარის საკონტაქტო ინფორმაცია, რომელიც ჩვეულებრივ ზედამხედველობს ცხოველს, ასეთის არსებობის შემთხვევაში.

3.9. კლიენტი მომვლელს არ სთხოვს ცხოველების სწავლებას ან გაწვრთნას, თუ მომვლელს არ აქვს შესაბამისი დადასტურებული განათლება და გამოცდილება და თუ მომვლელი აშკარად არ არის ამისთვის მზად. ცხოველების სწავლება და გაწვრთნა არ რეგულირდება მომსახურების გაწევის შესახებ ხელშეკრულებით.

3.10. კლიენტმა უნდა აუნაზღაუროს მომვლელს კლიენტთან შეთანხმებული, დოკუმენტურად დადასტურებული, ცხოველთან დაკავშირებული ყველა ხარჯი, რომელიც ცხოველის დროებით შეფარების განმავლობაში იქნა გაწეული.

3.11. თუ მომსახურებების გაწევის პერიოდში აღმოჩნდა, რომ კლიენტმა მომვლელს გადასცა არასრული ან არასარწმუნო ინფორმაცია ცხოველის შესახებ, რამაც მომვლელის ჯანმრთელობას ან ქონებას ზიანი მიაყენა, მაშინ მომვლელი უფლებამოსილია, მოსთხოვოს კლიენტს კომპენსაცია.

3.12. თუ დროებით შეფარების პროცესში გამოვლინდა ცხოველის აგრესიის ფაქტები და შემდგომმა დროებით შეფარებამ რისკი შეიძლება შეუქმნას მომვლელისა და/ან გარშემომყოფების სიცოცხლეს ან ჯანმრთელობას, მომვლელი ვალდებულია, დაუყოვნებლივ აცნობოს აღნიშნულის თაობაზე კლიენტსა და სუბიექტს. ასეთ შემთხვევაში, კლიენტი ვალდებულია, წაიყვანოს ცხოველი. კლიენტს შეუძლია, მომვლელს მოსთხოვოს შეტანილი თანხის ნაწილის დაბრუნება, დროებით შეფარებისთვის გადახდილი დარჩენილი პერიოდის პროპორციულად, ხოლო, მომვლელს შეუძლია, კლიენტს მოსთხოვოს კომპენსაცია ზიანისათვის, რაც ცხოველმა მიაყენა მომვლელის ჯანმრთელობასა და/ან ქონებას.

3.13. კლიენტმა თავისი ცხოველი უნდა წაიყვანოს დროებით შეფარების დასრულების დღეს, რომელიც მითითებულია ხელშეკრულებაში.

3.14. კლიენტი ადასტურებს, რომ ეთანხმება მომვლელების მუშაობის წესებს, რომლებიც განთავსებულია მისამართზე: https://catdogpetsitters.com/requirements. თუ კლიენტს დამატებითი რეკომენდაციები აქვს, მან ეს რეკომენდაციები აუცილებლად უნდა მიუთითოს დროებით შეფარების შეკვეთისას, რათა ისინი შეტანილ იქნეს მომვლელსა და კლიენტს შორის ხელშეკრულებაში.

4. წესები მომვლელებისთვის

4.1. მომვლელი იღებს ვალდებულებას, კლიენტისგან ჩაიბაროს ცხოველი მომსახურების დაწყების დღეს და შეაფასოს ცხოველის შესაბამისობა ხელშეკრულებაში მითითებულ ინფორმაციასთან.

4.2. მომვლელმა პირადად უნდა გაუწიოს მომსახურება კლიენტს.

4.3. მომვლელი იღებს ვალდებულებას, არ გამოიყენოს ცხოველი პირადი მიზნებისათვის.

4.4. მომვლელი უზრუნველყოფს ხარისხიან პირობებს, ხელშეკრულებაში მითითებული მოთხოვნებისა და უსაფრთხოების საზოგადოდ მიღებული მოთხოვნების შესაბამისად, რომლებიც გამოიყენება დროებით შეფარებისას. აღნიშნული მოთხოვნები განთავსებულია მისამართზე: https://catdogpetsitters.com/requirements.

4.5. მომვლელისთვის რეკომენდებულია, დროებით შეფარებამდე პირადად შეხვდეს კლიენტსა და ცხოველს, გაცნობის მიზნით. ყოველთვის უმჯობესია, თავდაპირველი გაცნობის ორგანიზება მოხდეს ნეიტრალურ ტერიტორიაზე.

4.6. თუ მომვლელს ჰყავს საკუთარი შინაური ცხოველები, მან აღნიშნულის თაობაზე კლიენტს უნდა შეატყობინოს დროებით შეფარებამდე.

4.7. თუ მომვლელს ჰყავს საკუთარი ძაღლი, აუცილებელია, ის წინასწარ გაეცნოს სტუმარ ძაღლს — თავდაპირველად ქუჩაში (ნეიტრალური ტერიტორია), რის შემდეგაც, საჭიროა მათი ერთად შეყვანა სახლში.

4.8. მომვლელმა არ უნდა აიყვანოს ისეთი სახეობის, ჯიშისა და ზომის ცხოველები, რომლებთანაც თავს არ გრძნობს კომფორტულად და რომლებსაც ვერ უმკლავდება.

4.9. მომვლელმა არ უნდა აიყვანოს ცხოველები ერთდროულად რამდენიმე მეპატრონისაგან.

4.10. მომვლელი უზრუნველყოფს ცხოველის მუდმივ წვდომას სუფთა სასმელ წყალზე.

4.11. მომვლელი უზრუნველყოფს ცხოველის კვებას კლიენტის რეკომენდაციების მკაცრი დაცვით, ამ უკანასკნელის მიერ მიწოდებული საკვებით.

4.12. მომვლელი უზრუნველყოფს ცხოველის აუცილებელ მოვლას კლიენტთან გაფორმებული ხელშეკრულების შესაბამისად.

4.13. მომვლელი არ უზრუნველყოფს ცხოველის სწავლებასა და გაწვრთნას, თუ მას არ აქვს შესაბამისი დადასტურებული განათლება და გამოცდილება და თუ კლიენტი პირდაპირ არ სთხოვს მომვლელს ამას.

4.14. კატეგორიულად აკრძალულია ცხოველის საბლის გარეშე გასეირნება. მომვლელი ძაღლს საბლით გაასეირნებს, იმ შემთხვევაშიც კი, თუ პატრონი ითხოვს ძაღლის საბლის გარეშე გასეირნებას.

4.15. მომვლელი თვალყურს მიადევნებს, რომ ცხოველი არ გაიქცეს ღია კარიდან და/ან ფანჯრიდან.

4.16. ავადმყოფობის მცირედი ნიშნების გამოვლენისას, მომვლელი დაუკავშირდება კლიენტს შემდგომი მოქმედებების განსაზღვრის მიზნით და შეატყობინებს სუბიექტის მხარდაჭერის სამსახურს. აშკარა პრობლემების შემთხვევაში, მომვლელი დაუყოვნებლივ მიმართავს ვეტერინარს და დაუკავშირდება კლიენტსა და სუბიექტის მხარდაჭერის სამსახურს.

5. მომვლელის მომსახურებების ანაზღაურება

5.1. კლიენტი მომვლელს მომსახურებისთვის თანხას გადაუხდის ნაღდი ანგარიშსწორებით, ან მომვლელის მიერ მითითებულ საბანკო ანგარიშზე თანხის გადარიცხვით.

5.2. დროებით შეფარების თანხის გადახდა ხდება კლიენტის მიერ ცხოველის მომვლელისთვის დროებით შეფარების მიზნით გადაცემის მომენტში.

5.3. დროებით შეფარების საფასური გამოითვლება ყოველი დღე-ღამისთვის, ანგარიშსწორების დრო არის ცხოველის მომვლელთან დროებით შეფარების მიზნით შესვლის დრო. პირველი დღე-ღამის თანხის გადახდა ყოველთვის სრულად ხდება. ანგარიშსწორების დროის შემდეგ გასვლისთვის დამატებითი გადასახადი გამოითვლება შემდეგი წესით:

5.3.1. ორ საათამდე დაყოვნების შემთხვევაში, დამატებითი გადასახადი არ მოითხოვება;

5.3.2. ორიდან ექვს საათამდე დაყოვნების შემთხვევაში, თანხას ემატება დროებით შეფარების სადღეღამისო ღირებულების 50%;

5.3.3. ექვს საათზე მეტი ხნით დაყოვნების შემთხვევაში, თანხას ემატება დროებით შეფარების სადღეღამისო ღირებულების 100%;

5.4. ნაადრევი/დაგვიანებული შესვლა/გასვლა 22:00 სთ-დან 08:00 სთ-მდე მონაკვეთში შესაძლებელია მომვლელთან წინასწარი შეთანხმებით. მომსახურების საფასური შეადგენს დროებით შეფარების საფასურის ნახევარს.

5.5. თუ კლიენტი ცხოველს დროებით შეფარების დასრულების დაგეგმილ დროზე ადრე წაიყვანს, მაშინ გამოუყენებელი დღეების საფასური არ ექვემდებარება დაბრუნებას.

5.6. კლიენტი მომვლელს გასეირნების საფასურს სრულად გადაუხდის გასეირნების დასრულების შემდეგ. გასეირნების საფასური გამოითვლება ყოველი საათისთვის, წუთობრივი ტარიფიცირება არ ხდება. კლიენტს შეუძლია, წინასწარ გადაუხადოს მომვლელს რამდენიმე გასეირნების საფასური და მიიღოს ფასდაკლება, რომელიც მითითებულია მისამართზე: https://catdogpetsitters.com/prices, გასეირნების წინასწარ გადახდილი აბონემენტის საფასური არ ექვემდებარება დაბრუნებას.

5.7. კლიენტი ზოოძიძის ვიზიტის საფასურს სრულად გადაუხდის მომვლელს ვიზიტის დასრულების შემდეგ. ზოოძიძის მომსახურების საფასური გამოითვლება ყოველი საათისთვის, წუთობრივი ტარიფიცირება არ ხდება. კლიენტს შეუძლია, წინასწარ გადაუხადოს მომვლელს რამდენიმე აუცილებელი ვიზიტის საფასური, ვიზიტების დაწყებამდე.

6. მომვლელის უარი დროებით შეფარებაზე

6.1. თუ დროებით შეფარებამდე მომვლელს წარმოექმნა ვალდებულებები, რომლებიც ხელს უშლის დროებით შეფარებას, მომვლელი ვალდებულია, დაუყოვნებლივ აცნობოს ამის შესახებ კლიენტსა და სუბიექტს. ასეთ შემთხვევაში, კლიენტს აქვს უფლება, დადოს ცხოველის დროებით შეფარების შესახებ ხელშეკრულება იმავე პირობებით, სუბიექტის მიერ შეთავაზებულ ნებისმიერ სხვა მომვლელთან, ან უარი თქვას დროებით შეფარებაზე.

6.2. თუ დროებით შეფარების პროცესში მომვლელს წარმოექმნა გარემოებები, რომლებიც ხელს უშლის შემდგომ დროებით შეფარებას, მომვლელი ვალდებულია, დაუყოვნებლივ აცნობოს ამის შესახებ კლიენტსა და სუბიექტს. ასეთ შემთხვევაში, კლიენტს შეუძლია:

6.2.1. დადოს ცხოველის დროებით შეფარების შესახებ ხელშეკრულება სუბიექტის მიერ შეთავაზებულ ნებისმიერ სხვა მომვლელთან, დროებით შეფარებისთვის გადახდილი დარჩენილი პერიოდის საფასური, ამ შემთხვევაში, ეკისრება მომვლელს;

6.2.2. უარი თქვას დროებით შეფარების მომსახურებაზე, მომვლელს მოსთხოვოს შეტანილი თანხის ნაწილის დაბრუნება დროებით შეფარებისთვის გადახდილი დარჩენილი პერიოდის პროპორციულად, შეწყვიტოს ხელშეკრულება და დაიბრუნოს ცხოველი.

7. ცხოველის დაავადება

7.1. ცხოველის დაავადების, მოწამვლის ან ტრავმის მიღების შემთხვევაში, მომვლელმა აღნიშნულის თაობაზე დაუყოვნებლივ უნდა აცნობოს კლიენტს, მიმართოს კლიენტის მიერ დასახელებულ ვეტერინარს, ცხოველისთვის დიაგნოზის დასმისა და აუცილებელი დახმარების აღმოჩენის მიზნით. თუ კლიენტს არ მოუწოდებია ინფორმაცია ვეტერინარის შესახებ, მომვლელი თავად შეარჩევს ექიმს.

7.2. დროებით შეფარების პერიოდში შინაური ცხოველის მიერ მიღებული მექანიკური ტრავმების მკურნალობის საფასურს ანაზღაურებს მომვლელი. თუ ასეთი ტრავმის წარმოქმნისთვის მომვლელის პასუხისმგებლობა პირდაპირ არის შეზღუდული ხელშეკრულებითა და სამომხმარებლო შეთანხმებით, ან თუ სიტუაციიდან გამომდინარეობს, რომ გონივრული სიფრთხილით მოქმედებისას, მომვლელს არ ჰქონდა შესაძლებლობა, წინასწარ განეჭვრიტა და აეცილებინა ასეთი ტრავმების წარმოქმნა, მკურნალობა ხორციელდება კლიენტის ხარჯზე, დოკუმენტურად დადასტურებული იმ ხარჯების კომპენსაციით, რაც მომვლელმა გასწია ვეტერინარულ მომსახურებასა და წამლებზე, ცხოველის სრულად განკურნებამდე ან მისი პატრონისთვის დაბრუნებამდე.

7.3. ჰელმინთების, რწყილების მკურნალობა, აგრეთვე, მწერების ნაკბენის შედეგად გამოწვეული დაავადებების, როგორიცაა ტკიპა, ფუტკარი და ა.შ., მკურნალობა ხორციელდება კლიენტის ხარჯზე (თუ მომვლელმა გამიზნულად არ ჩააგდო ცხოველი საფრთხეში, ან შექმნა ცხოველის ინფიცირების ან დაკბენის პირობები), დოკუმენტურად დადასტურებული იმ ხარჯების კომპენსაციით, რაც მომვლელმა გასწია ვეტერინარულ მომსახურებასა და წამლებზე, ცხოველის სრულად განკურნებამდე ან მისი პატრონისთვის დაბრუნებამდე.

7.4. სხვა დაავადებების მკურნალობა ხორციელდება მომვლელის მიერ, კლიენტის ხარჯზე. პროცედურებს, რომლებიც არ მოითხოვს კვალიფიციურ ვეტერინარულ დახმარებას, მომვლელი დამოუკიდებლად ატარებს, წამლებისთვის გაწეული, დოკუმენტურად დადასტურებული ხარჯების კომპენსაციით ან კლიენტის მიერ მოწოდებული წამლების გამოყენებით.

7.5. დროებით შეფარებისას ცხოველის დაღუპვის შემთხვევაში, მომვლელი ვალდებულია, დაუყოვნებლივ აცნობოს აღნიშნულის თაობაზე კლიენტსა და სუბიექტის მხარდაჭერის სამსახურს, ასევე, კლიენტის მოთხოვნით, ცხოველის გვამი ვეტერინარულ დაწესებულებას გადასცეს გასაკვეთად და დაღუპვის მიზეზების დასადგენად. გაკვეთის საფასურს იხდის კლიენტი.

8. ცხოველის დაკარგვა

8.1. მომსახურების გაწევის დროს ცხოველის დაკარგვის შემთხვევაში, მომვლელმა დაუყოვნებლივ უნდა აცნობოს აღნიშნულის თაობაზე სუბიექტის მხარდაჭერის სამსახურსა და კლიენტს, ასევე, მომვლელი ვალდებულია, დაიცვას სუბიექტის ინსტრუქციები და მითითებები ცხოველის მოსაძებნად და მისი მხრიდან მიიღოს ყველა შესაძლო ზომა ცხოველის კლიენტისთვის დასაბრუნებლად.

8.2. თუ ცხოველის დაკარგვიდან ათი კალენდარული დღის განმავლობაში ცხოველი არ მოიძებნა, მომვლელი და კლიენტი ვალდებული არიან, მოაგვარონ ზიანის ანაზღაურების საკითხი.

9. ვადაგადაცილება

9.1. თუ დროებით შეფარების ვადის დასრულების შემდეგ კლიენტი არ წაიყვანს ცხოველს, მომვლელი ვალდებულია, შეინახოს ცხოველი დროებით შეფარების ვადის დასრულების მომენტიდან 10 დღე-ღამის განმავლობაში, დამოუკიდებლად განსაზღვროს შენახვის ადგილი, პირები, რომლებიც უზრუნველყოფენ ცხოველის მოვლის მომსახურებას, ასევე, შენახვის პირობები, იმ დათქმით, რომ უზრუნველყოფილი იქნება ცხოველის უსაფრთხო და ხარისხიანი მოვლა. კლიენტი ვალდებულია, გადაიხადოს მომვლელის მიერ გაწეული ყველა ხარჯი ასეთ შენახვასთან დაკავშირებით, მაგრამ არანაკლებ ხელშეკრულებით განსაზღვრული საფასურისა ყოველი ვადაგადაცილებული დღისთვის.

9.2. აღნიშნული ვადის ამოწურვისას, კლიენტის მხრიდან შეუტყობინებლობის შემთხვევაში, ცხოველი ითვლება უპატრონოდ და მომვლელს აქვს უფლება, განკარგოს ცხოველი თავისი შეხედულებისამებრ.

10. მომხმარებელთა მასალები

10.1. მომხმარებელი სუბიექტს უსასყიდლოდ გადასცემს მასთან ურთიერთქმედების პროცესში განთავსებული ნებისმიერი მასალის გამოყენების უფლებას, ასეთ მასალებზე ექსკლუზიური უფლებების მოქმედების მთელი ვადის განმავლობაში და გამოყენების ტერიტორიის შეუზღუდავად.

10.2. მომხმარებელი იძლევა თანხმობას ყველა იმ ფიზიკური პირის გამოსახულებების გამოყენებაზე, რომლებიც წარმოდგენილია განთავსებულ მასალებზე.

10.3. კლიენტი იძლევა თანხმობას მისი კუთვნილი ცხოველის იმ გამოსახულებების გამოყენებაზე, რომლებიც წარმოდგენილია განთავსებულ მასალებზე.

10.4. ნებადართული გამოყენების მეთოდები მოიცავს, მათ შორის, აღწარმოების, გავრცელების, საჯარო ჩვენების, საჯარო შესრულების, გასაჯაროების, გადამუშავებისა და ქველიცენზირების უფლებებს.

10.5. შეტყობინებების გაგზავნის მომსახურებები სუბიექტსა და მომხმარებლებს შორის არ არის პირადი და არ არის გამიზნული ისეთი ინფორმაციის გაცვლისთვის, რომლის გასაჯაროებასაც მომხმარებლები არ აპირებენ. სუბიექტი უფლებამოსილია, გამოიყენოს ასეთი მასალები, ვიდეოჩანაწერებისა და ფოტოების ჩათვლით, საკუთარი შეხედულებისამებრ, მათ შორის, მარკეტინგული მიზნებისათვის.

11. სუბიექტის მასალები

11.1. მომხმარებელს ენიჭება ვებსაიტის უსასყიდლო ფუნქციონალური გამოყენების უფლება ჩვეულებრივი (არაექსკლუზიური) ლიცენზიის პირობებით, რომლის სხვა პირებზე გადაცემაც არ არის შესაძლებელი.

11.2. სუბიექტი უფლებამოსილია, დააწესოს შეზღუდვა მომხმარებლის მიერ განთავსებული მასალების მოცულობასა ან შემადგენლობაზე, ასევე, პლატფორმის ან ვებსაიტის გამოყენების ტექნიკურ შესაძლებლობებზე.

11.3. სუბიექტის მომსახურების გამოყენებით ხელმისაწვდომ ან ვებსაიტზე განთავსებულ ნებისმიერ მასალაზე ექსკლუზიური უფლებები ეკუთვნის სუბიექტს.

11.4. ასეთი მასალების გამოყენება დაშვებულია მხოლოდ შეთანხმებით გათვალისწინებული ფუნქციონალის ფარგლებში. მომხმარებელს არ აქვს ამ მასალების დაკოპირების ან სხვაგვარად გამოყენების უფლება.

11.5. სუბიექტის ვებსაიტი და/ან სხვა მასალები შეიძლება შეიცავდეს სხვა ვებსაიტებზე გადამისამართების ჰიპერბმულებს, რომელთა შიგთავსის შემოწმება არ არის სუბიექტის ვალდებულება. სუბიექტი არ არის პასუხისმგებელი მესამე პირთა საიტებზე განთავსებული შიგთავსის შემოწმებაზე, ისევე, როგორც მომხმარებლის მიერ ასეთ საიტებზე შესვლის შედეგებზე. თუ პირდაპირ არ არის ამის შესახებ მითითებული, ნებისმიერი ფორმით ბმულის არსებობა არ წარმოადგენს სუბიექტის რეკომენდაციას ან მოწონებას იმ შიგთავსთან, პროდუქტთან ან მომსახურებასთან მიმართებით, რომელზეც მიუთითებს ბმული.

12. პასუხისმგებლობის შეზღუდვა

12.1. სუბიექტი წარმოადგენს მხოლოდ და მხოლოდ საინფორმაციო (და, ზოგიერთ შემთხვევაში, — სარეკლამო) პლატფორმას და არ აგებს პასუხს კლიენტების წინაშე მომვლელების მოქმედებებისათვის. სუბიექტი არ აკონტროლებს კლიენტსა და მომვლელს შორის ხელშეკრულების გაფორმების პროცესს. სუბიექტი არ აწარმოებს მომვლელის მიერ ცხოველების შენახვის პირობების შემოწმებას მომსახურებების გაწევის პროცესში.

12.2. სუბიექტსა და კლიენტს შორის ურთიერთობებში არ გამოიყენება საკანონმდებლო ნორმები მომხმარებელთა უფლებების დაცვის შესახებ. კლიენტი მომვლელს უხდის ანაზღაურებას ცხოველის დროებით შეფარების მომსახურებისთვის. სუბიექტი კლიენტს საინფორმაციო მომსახურებას უწევს უსასყიდლოდ.

12.3. ვებსაიტსა და სუბიექტის მომსახურებებზე წვდომის მინიჭება ხორციელდება „როგორც არის“ — “as is” პრინციპით. სუბიექტი არ იძლევა გარანტიას, რომ ის შეესაბამება მომხმარებლის რაიმე მოლოდინებსა თუ მოთხოვნებს, მათ შორის, მომსახურებების გაწევის ხარისხსა და წესებთან დაკავშირებით. ვებსაიტის გამოყენებით მიღებულ ნებისმიერ ინფორმაციას მომხმარებელი იყენებს საკუთარი რისკის ქვეშ და დამოუკიდებლად არის პასუხისმგებელი მსგავსი ინფორმაციის გამოყენების ყველა შესაძლო შედეგზე, მათ შორის, ამგვარად მიყენებულ ზიანზე, რაც მოიცავს კომპიუტერისთვის მიყენებულ ზიანს, მონაცემთა დაკარგვასა თუ ნებისმიერ სხვა ფიზიკურ ან მორალურ ზიანს.

12.4. სუბიექტი არ არის პასუხისმგებელი ზარალზე, რომელიც წარმოიქმნა სუბიექტის მომსახურებათა გამოყენების ან ვებსაიტზე წვდომის შედეგად.

12.5. მომხმარებელი ვალდებულია, სრული მოცულობით აუნაზღაუროს სუბიექტს ყველა ზარალი, რომელიც ამ უკანასკნელს მიადგება მისი პასუხისმგებლობის დადგომის შემთხვევაში, მომხმარებლის მიერ მესამე პირთა უფლებების დარღვევებთან დაკავშირებით.

12.6. მომვლელი არ არის პასუხისმგებელი კლიენტის წინაშე:

12.6.1. ისეთი ქრონიკული ან ძნელად დიაგნოსტირებადი დაავადებების ან ტრავმების გამწვავებისთვის, რომლებიც არსებობდა ცხოველის მიღების დროს და რომლებმაც გამოიწვია გადაუდებელი ვეტერინარული დახმარების, ქირურგიული ჩარევის ან ვეტერინარულ სტაციონარში ცხოველის ოპერაციის შემდეგ ყოფნის საჭიროება.

12.6.2. ცხოველის ქმედებებისთვის, რომელთა თავიდან აცილება შეუძლებელია (გაკაწვრა, თათების, დრუნჩის ჩაყოფა მაგარ კონსტრუქციებში, ბეწვის ლოკვა, სათამაშოების ან ქსოვილის ნაჭრების გადაყლაპვა და ა.შ.), რომლებმაც გამოიწვია ტრავმები (დაბეჟილობები, დატეხილი ფრჩხილები, გადაყვლეფები და ა.შ.), ნაწლავების გადახლართვა, კუჭ-ნაწლავის ტრაქტის გაუვალობა და გადაუდებელი ვეტერინარული დახმარების, ქირურგიული ჩარევისა და ვეტერინარულ სტაციონარში ოპერაციის შემდეგ ყოფნის საჭიროება, იმ შემთხვევაში, თუ უზრუნველყოფილია დროებით შეფარების მაღალი ხარისხი და უსაფრთხო პირობები ხელშეკრულებაში მითითებული მოთხოვნებისა და უსაფრთხოების საზოგადოდ მიღებული მოთხოვნების შესაბამისად, რომლებიც გამოიყენება დროებით შეფარებისას. აღნიშნული მოთხოვნები განთავსებულია მისამართზე:https://catdogpetsitters.com/requirements.

12.6.3. გარე ვეტერინარული კლინიკის ძალებით ცხოველისთვის აღმოჩენილი გადაუდებელი ვეტერინარული დახმარებისთვის (მათ შორის, ქირურგიული ჩარევისა და ვეტერინარულ სტაციონარში მოვლის) ხარისხი და შედეგები.

12.6.4. ცხოველისთვის გადაუდებელი დახმარების აღმოჩენის მიზნით ნარკოზის გამოყენების ნებისმიერი შედეგისთვის.

12.6.5. ხანშიშესული ცხოველის ან ადამიანების მიმართ აგრესიული ქცევის მქონე ცხოველისთვის ვეტერინარული დახმარების აღმოჩენის შეუძლებლობისთვის.

12.6.6. ცხოველის წონის მატების ან კლებისთვის, რომელიც დაკავშირებულია ძაღლის მეპატრონესთან განშორებით გამოწვეულ კვებითი ქცევის ფსიქოემოციურ დარღვევასთან.

12.6.7. ხანშიშესული ან დასუსტებული ჯანმრთელობის მქონე (ცხოვრების პირობების ცვლილებითა და მეპატრონესთან განშორებით გამოწვეული ფსიქოსომატური რეაქციის შედეგად) ცხოველის ლეტალური შედეგისთვის.

12.6.8. ცხოველისთვის ნეგატიური შედეგებისთვის, რაც გამოწვეულია კლიენტის მიერ ცრუ ვეტერინარული დოკუმენტების ან ცხოველის ხასიათის, ჯანმრთელობის, მოვლის პირობებისა და კვების შესახებ არასრული/არასარწმუნო ინფორმაციის მოწოდებით.

13. სხვა პირობები

13.1. შეთანხმება მოიცავს სუბიექტისა და მომხმარებლების ურთიერთსანაცვლო უფლებებისა და მოვალეობების სრულ ჩამონათვალს.

13.2. შეთანხმების ნაწილის ბათილობა არ იწვევს მთლიანი შეთანხმების ბათილობას.

13.3. წინამდებარე შეთანხმების მოქმედების პერიოდში მხარეებს შორის წარმოქმნილ ყველა დავასა და უთანხმოებას მხარეები მოლაპარაკებების გზით წყვეტენ.

13.4. თუ დავები მოლაპარაკების გზით არ მოგვარდება, დავა წყდება საქართველოს კანონმდებლობის შესაბამისად.

13.5. დებულებები, რომლებიც არ დარეგულირდება წინამდებარე შეთანხმებით, მოწესრიგდება საქართველოს მოქმედი კანონმდებლობის დებულებების შესაბამისად.